في كل يوم

كل يوم اصحى وامشي واتحرك وحتى لما بنام

بالاقي مليون فكرة وخاطر بيشدونى واول ما افكر اكتب الاقيني كسلااااانه جدا لدرجة انى تصورت انى عمرى ما هابتدي

حتى فكرة انى ابتدى كنت شكه فيها رغم انى قررتها من زماااااااااان بس ولا مرة نفذت الفكرة

مع انى من الناس اللى اقدر اصنفهم (مستثارين) انا منسيتش الشين يعنى مقصدش مستشارين

انا اقصد كل حاجة بتثير جواهم الف فكرة والف تعليق

بس بيضيعوا قبل ما يثبتوا او يتوثقوا في شكل طبيعي (في صورة كلمات)

وحتى دلوقتى ولما اخيرا ابتديت حسه انى كل الكلام ضايع منى ومش عارفه الملم افكاري ولا اعبر عنها وحتى مش عارفه ابتدي منين

الاحسن انى ابتدى من الاول :

انا باعمل مدونة ليه؟؟؟؟؟؟؟

عشان عاوزة اعبر عن كل خلجاتي من غير تحفظات ويحصل اللى يحصل

انما هاقدر اعمل كده ولا لأ؟ ده اللى لسه مش عرفاه ...

واااااااااادى اول مشاركة وبرضه طلعت مش مفهومة

الاثنين 18-2-2008

بحب اكتب شرطة بين التاريخ وبعضه ومع ان الناس مش متعودة عليها لكنها بتفكرني باول سنين الدراسة كانوا بيكتبوا لنا بالشكل ده على السبورة

فكرة كتابة تاريخ اليوم بالشكل ده ممكن تخلينى ابتدى اتكلم عن البداية خااااااااااااااالص

مع انى معتقدش ان حد ممكن يستفيد

لكن مش مهم انا باخرج كل اللى ممكن يخرج عشان انا فعلا اتمليت جدا

مبقاش في مكان يتحمل زيادة

عاوزة بس افضي مكان جوايا